炎明熹演唱會丨尾場三度落淚  任賢齊驚喜現身大讚：Gigi係未來嘅天后

一連三場《炎明熹Gi-FORCE演唱會2024》在昨晚（4月14日）於九展舉行尾場，亦是去年10月因颱風關係而取消的補場場次。是晚，陳煒與丈夫陳國強、姜皓文、陳山聰與囝囝陳霆軒、李幸倪到場支持。

來到《炎明熹Gi-FORCE演唱會2024》第三場，Gigi依然狀態大勇，又唱又跳表現落力，不過這晚的後空翻動作發生了小插曲，正當Gigi完成空翻動作落地時，可能用力太猛，最終Gigi被衛衣的帽「兜頭笠」，完全遮擋視線，只見Gigi先露出既可愛又尷尬的笑容，之後秒速整理衣服繼續又跳又唱，緩解這蝦碌場面。

炎明熹演唱會丨 「爸爸」姜皓文任嘉賓考Gigi演技　新歌《還有一艘救生艙》MV 點擊破百萬

▲ Gigi完成空翻後被衛衣的帽「兜頭笠」。

林智樂大讚Gigi
 
除唱自己的歌，當然少不了她的「自選歌單」，當中有王菲的《守望麥田》、Serrini的《網絡安全隱患》、及陶喆的《流沙》等，Gigi笑指這張歌單由逾200首歌精心挑選，又說：「大家知唔知呢場係補場呢？想問吓嗰時（取消）大家有冇失望？」台下即大叫：「冇」，Gigi笑住讚歌迷思想正面。
 
在過去三場演唱會任Gigi音樂團隊成員的林智樂（Felix），來到尾場按捺不住，要在台上公開力讚Gigi除唱功，抗壓能力亦很強悍：「雖然有好多人讚佢，但有時都有啲好尖銳嘅留言，但佢都冇嘢，更重要係由我啱啱識佢到而家，佢個初心都冇變，對每個人都好好。有時記者朋友問我會唔會羨慕Gigi嘅事業，我覺得唔係羨唔羨慕，而係佢真係好值得擁有！」身旁的Gigi即感動表示，很少聽對方如此認真說話，並感謝對方為自己唱足三晚。

任賢齊驚喜現身
 
接着，Gigi獻唱《星語心願》，唱到最後那句「讓你知道我愛你」，台下即熱情回應「我都好愛你呀」。她表示小時候看電影《星願》，已經很喜歡電影的男主角，Gigi隨後唱出《對面的女孩看過來》，任賢齊（小齊）此時突然現身合唱，讓樂迷大為驚喜，更全場大合唱為演唱會掀起高潮。唱畢，Gigi說：「畀啲掌聲任前輩。」

小齊謙虛感謝Gigi畀機會自己做嘉賓：「 因為我成間公司所有同事都好鍾意Gigi。噚日我喺新加坡做完演唱會返嚟，我啲夥計全部唔見晒，個個都嚟睇你，仲要一張飛都冇留畀我！同事們，聽住，聽日返工唔使咁早，好好享受今晚Gigi嘅演唱會。」他又笑謂Gigi與自己的女兒同一年出世，小齊搞笑說：「人多嘅時候叫我小齊哥，唔好叫Uncle呀。」

▲ 任賢齊當《炎明熹Gi-FORCE演唱會2024》尾場嘉賓。

小齊睇好Gigi做天后
 
之後，Gigi送上繡有小齊名字的水樽：「我知你5月份開巡迴演唱會，所以我揀咗呢個，識自己煲水嘅水樽，呢個可以直接煲水，非常方便，我都繡咗你個名喺度。」

小齊自嘲年輕的時候仍會飲凍飲：「漸漸就用咗暖水壺啦，好多謝你。我真係成間公司都講，佢係未來嘅天后，希望大家都畀多啲機會Gigi。」最後小齊再為樂迷送上《我是一隻魚》，全場跟著和唱。

▲ 任賢齊當《炎明熹Gi-FORCE演唱會2024》尾場嘉賓。

感觸唱到喊
 
除嘉賓夠份量，這晚的驚喜同樣一浪接一浪，開騷前大批歌迷要求Gigi唱出MV在YouTube短短4天破百萬點擊的新歌《還有一艘救生艙》，收到大家的訴求後，Gigi特意於補場上送予歌迷。

但卻一時感觸唱到喊，幾乎大半首歌要台下歌迷代唱，說：「我覺得我又代入咗首歌裡面，但唔係愛情，今日係最後一場演唱會，即係今日係最後嘅一次，然後大家要遠離我嘅感覺。點解今晚先揀呢首歌嚟唱？因為我想送呢首歌畀補場嘅大家，但係我真係冇用，成首都唱唔到，要大家幫我，我下次會唱好佢㗎。」台下再次大叫「加油」，為哭成淚人的Gigi打氣。

稱每位歌迷都是傳奇
 
Encore部份，Gigi特別為尾場的樂迷獻唱《你是你本身的傳奇》，坦言台下每位歌迷都是個傳奇，一起成就了她的歌手夢，Gigi再次落淚，對於這個人生第一個演唱會舞台、還有台下的觀眾，充滿不捨之情。

唱到演唱會最後一首歌《Only For Me》，Gigi叫大家高舉手機燈和唱，望向這遍燈海，Gigi的淚水再一次滑落，令《炎明熹Gi-FORCE演唱會2024》，在淚水與不捨之情下，感動落幕。

最新影片推介：余香凝專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5